काठमाडौं । आगामी फागुन १७ गतेबाट रिलिज हुने फिल्म ‘क्याप्टेन’को एक गीत ‘कर्ली कर्ली’को छायांकन गरिएको छ । ललितपुरको एक पार्टी प्यालेसमा छायांकन गरिएको गीतमा नायका निरुता सिंह, निर्माता तथा अभिनेता भुवन केसी र नायक अनमोल केसी फिचर्ड छन् । गीतमा ‘इशान’ लेखिएको ११ नम्बरको जर्सी लगाएका कोरसको पनि सहभागिता थियो ।
मेलिना राई र एसडी योगीको स्वर रहेको गीतमा एसडीकै शब्द तथा संगीत छ । गीतको भिडियोको कोरियोग्राफी रेनशा वान्तवा राइले गरेकी छन् । फिल्ममा अनमोल केसी, उपासना सिंह ठकुरी, प्रियंका एमभी, सुनिल थापा, प्रशान्त ताम्राकार, विल्सन विक्रम राई मुख्य भूमिकामा छन् ।
दिवाकर भट्टराइको निर्देशनमा तयार भएको चलचित्रमा सुदिप बरालको छायांकन छ । यो गीत केही दिनमै रिलिज गर्ने तयारी यसको निर्माणपक्षले गरेको छ । कलाकारको पहिरनको डिजाइन स्वर्णिम राइले गरेकी हुन् ।
