काठमाडौं । आगामी चैत १५ गतेबाट रिलिज हुने फिल्म ‘शुभलभ’को ट्रेलर सार्वजनिक भएको छ । युवा ज्योतिष हरिहर अधिकारीको डेब्यु अभिनय रहेको फिल्ममा हरिहरलाई दर्शकले ज्योतिषकै चरित्रमा हेर्न पाउनेछन् । नवनायिका कृस्टिन पौडेलको अपोजिटमा अभिनय गरेका हरिहरको प्रेमजीवनमा आइपर्ने उतारचढावलाई ट्रेलरमा देखाइएको छ ।
बुद्ध इन्टरटेनमेन्टको ब्यानरमा निर्माण भएको फिल्मका प्रस्तुतकर्ता श्री प्रदीपकुमार उदय हुन् । निर्माता तथा निर्देशक सन्तोषबाबु लोहनीले निर्देशन गरेको फिल्ममा धर्मराज शर्मा सुबेदीको लगानी छ । ट्रेलरमा नायक हरिहरलाई आक्रामक चरित्रमा पनि देखाइएको छ ।
फिल्ममा सरोज खनाल, राजाराम पौडेल, राजा राजेन्द्र पोखरेल, रविन्द्र झा, प्रदीप बास्तोला, डाक्टर सुर्या थापा, अनुज पाण्डेलगायतको अभिनय छ । निर्माता तथा हल सञ्चालक श्री प्रदीपकुमार उदय अतिथी भूमिकामा छन् ।
फिल्ममा हरिहर अधिकारीको कथा, अभिमन्यु निरवीको पटकथा तथा संवाद, अर्जुन पोखरेलको संगीत, कोरियोग्राफी रामजी लामिछाने, रामेश्वर कार्कीको छायांकन, रोशनविक्रम भट्टराईको द्वन्द्व, बनिष शाह र भुपेन्द्र अधिकारीको सम्पादन रहेको छ ।
