काठमाडौ । आगामी भदौ ६ गतेबाट रिलिज हुने फिल्म ‘जाइरा’को आइटम गीत ‘यो मात चढेको साँझ’ सार्वजनिक भएको छ । पुरानो फिल्म ‘मनको बाँध’मा समावेश यो गीतको रिमेक भर्सनमा मिना निरौलाको स्वर छ । तत्कालिन अवस्थामा यो गीतमा मीरा राणाले स्वर दिएकी थिइन् ।
गीतमा गीतकार किरण खरेलको शब्द र शिवशंकरको संगीत छ । रिमेक गीतमा भने फिरोज बज्राचार्य र डिजे राजुले रिएरेञ्ज गरेका छन् । गीमा तनुजा गुरुङ फिचर्ड छिन् । गीतमा गोविन्द राईको कोरियोग्राफी छ ।
फिल्ममा नायिका नम्रता श्रेष्ठ मिक्स मार्शल आर्ट खेलाडीको भूमिकामा छिन् । पर्दामा प्रायः लभर गर्लको भूमिकामा प्रस्तुत हुँदै आएकी श्रेष्ठले यस चलचित्रमा भने आफुलाई एक्सन प्रधान देखाएकी छन् । यो फिल्मलाई आशुतोष राज श्रेष्ठले निर्देशन गरेका हुन् ।
फिल्ममा नम्रताको साथमा अनुप बिक्रम शाही, प्रमोद अग्रहरी, रेमन दास श्रेष्ठसहित नव–कलाकारहरु श्रृजना रेग्मी, सुजता श्रेष्ठ र सम्राट मगरले शिर्ष भूमिकामा अभिनय गरेका छन् । पटकथाको काम निर्देशक श्रेष्ठ र निरोज महर्जनले सम्हालेका छन् । कटामरी फिल्मस्को ब्यानरमा निर्माण भएको यो चलचित्र नम्रता श्रेष्ठ प्रोडक्शन र ट्रेन्डसेटर्स प्रालिको ब्यानरमा प्रस्तुत भएको हो । प्रशन्न गोपाली कार्यकारी निर्माता रहेको यो चलचित्रलाई बाबु श्रेष्ठले छायांकन तथा लोकेश बज्रचार्यले सम्पादन गरेका हुन् ।
