काठमाडौं । आगामी भदौ ६ गते रिलिज हुने फिल्म ‘जाइरा’की नायिका नम्रता श्रेष्ठले अन्य अभिनेत्रीले फिल्मका लागि हिम्मत नगरेकोले आफूले हिम्मत गरेको बताएकी छन् । फिल्मको प्रमोसनका लागि फिल्म युनिटसहित पोखरा पुगेकी नम्रताले पोखराका पत्रकारमाझ यो कुरा बताएकी हुन् ।
पोखरामा पत्रकारले ‘तपाईँले आँफैले लगानी गरेर जोखिम मानिने महिला प्रधान एक्शन फिल्म बनाउने हिम्मत कसरी गर्नुभयो ?’ भन्ने प्रश्नमा नायिका नम्रताले अरुले हिम्मत नगरेकोले आफुले एक्शन फिल्म बनाउन हिम्मत गरेको बताईन् । श्रेष्ठले आफुले यस प्रकारको भूमिकामा अभिनय गर्न सक्दिन भन्ने भ्रमलाई चिर्दै अभिनय गरेको बताईन् ।
प्रचार यात्रामा अभिनेता प्रमोद अग्रहरी, कलाकारहरु सुजिता श्रेष्ठ र सम्राट मगर लगायत रहेका छन् । पत्रकार सम्मेलनमा पोखरामा स्थायी बसोबास गर्ने कलाकार सम्राट मगरलाई सञ्चारकर्मीमाझ परिचित गराईएको थियो । ’फिटनेस ट्रेनर’ सम्राटले यसै फिल्मबाट अभिनयमा डेब्यू गरेका हुन् । उनी जाइरा अर्थात नम्रता श्रेष्ठको कोचको भूमिकामा रहेका छन् ।
पत्रकार सम्मेलनमा अभिनेता प्रमोद अग्रहरीको लुक्सको चर्चा भयो । ट्रेलरमा देखिएको लुक्स बारे सञ्चारकर्मीको जिज्ञासामा उनले भदौ ६ गते फिल्म हेरेपछि उक्त राज खुल्ने बताए । अग्रहरीले ’जाइरा’मा आफु नेगेटिभ भूमिकामा भएकोले ट्रेलरमा केहि ग्ल्यामर देखिएको प्रष्ट्याए । उनले फिल्ममा पनि स्वभावतस् ग्ल्यामर देखिने खुलाए ।
त्यस्तै, पोखरामै ’टम्बल वीड’ ब्याण्डले ’जाइरा’को ओरिजिनल साउण्ड ट्रयाक ‘जिन्दगीको खेल’को प्रस्तुती दिएको छ । लेकसाइडको रोलिङ्ग स्टोन रक बारमा बिशेष प्रस्तुती दिँदै ब्याण्डले चलचित्रको ओएसटी प्रस्तुत गरेको हो । उक्त ओएसटी इन्टरनेटमा भने केहि दिनमा सार्वजनिक गरिने बताईएको छ । चलचित्रको ओएसटी निर्माण गरेको उक्त ब्याण्ड सोहि प्रस्तुतीको लागि पोखरा पुगेको थियो । लेकसाइडमा नै रहेको अल्टिच्युड लञ्जमा ’मिट एण्ड ग्रिट’ कार्यक्रमको आयोजना गरिएको थियो ।
यसैगरी, पोखराका स्थानिय सञ्चारमाध्यमहरुमा समेत पुगेको ’जाइरा’ टीम ट्रेड मलमा रहेको चलचित्र हल तथा मिड टाउन चलचित्र हल तथा अन्य सपिङ्ग कम्प्लेक्समा दर्शकसामु साक्षात्कार गर्न पुगेको थियो । अन्य केहि शहरहरुमा समेत ’जाइरा’ टीम प्रचारको लागि पुग्नेछन् । आशुतोष राज श्रेष्ठले निर्देशन गरेको ’जाइरा’मा नम्रता श्रेष्ठ, अनुप बिक्रम शाही, प्रमोद अग्रहरी, श्रृजना रेग्मी, सुजिता श्रेष्ठ, सम्राट मगरलगायतका कलाकारहरुको अभिनय रहेको छ ।
