मुम्बई(एजेन्सी) । बलिउड सुपरस्टार दीपिका पादुकोण केही समय अघि मात्र आफू डार्क रोमान्टिक फिल्ममा देखिन लागेको बताएकी थिइन् । त्यही समयदेखि उनका शुभचिन्तकलाई दीपिकाले कुन फिल्ममा आफूलाई उपस्थित गराउदैछिन् भन्ने अड्कलबाजी चलेको थियो ।
तर प्राप्च समाचार अनुसार दीपिकाले अभिनय गर्ने फिल्म केबल डार्क रोमान्टिक फिल्म मात्र होइन, एक सुपरहिट हरर फिल्मको रिमेक पनि हुनेछ । दीपिका तेलुगूको सुपरहिट हरर फिल्म ‘अरुन्धति’को रिमेकमा देखिन लागेकी हुन् । फिल्ममा दीपिका प्रमुख भूमिकामा अभिनय गर्नेछिन् । यो फिल्मको ओरिजिनल भर्सनमा अनुष्का सेठ्ठीले अभिनय गरेकी थिइन् ।
हिन्दी रिमेकको निर्देशन पनि तेलुगूका कोडी रामाकृष्णले नै गर्छन् या कोही अन्य निर्देशकले गर्छन् भन्ने केही खुलाइएको छैन । तेलुगूमा फिल्मले पाएको सफलताका कारण यो फिल्मलाई बंगाली भाषामा पनि निर्माण गरिएको थियो । बंगाली भाषाको फिल्म पनि सुपरहिट भएको थियो । दीपिकाले हालै मात्र फिल्म ‘८३’को सुटिङ पुरा गरेकी छन् । फिल्ममा उनी रणवीर सिंहको श्रीमतिको भूमिकामा देखिँदैछिन् ।
