मुम्बई(एजेन्सी) । हलिउडको मार्बल स्टुडियोले आजका दिनसम्म पनि आफ्नो सुपरहिरो फिल्मका कारण अर्बौको व्यापार गरिरहेको छ । तर यो फिल्म बनाउनकै लागि मार्बलले ठूलो मेहनत पनि गर्नुपरेको छ । उसले कमिक बुकको आफ्नो चरित्रलाई निकालेर ठूलो पर्दामा ल्याएको थियो । सम्भवत बलिउडमा पनि चाँडै नै यस्तै सुपरहिरोको कथामा दर्शकले फिल्म हेर्न पाउनेछन् ।
समाचार अनुसार अभिनेता रणवीर सिंह चाँडै नै ठूलो पर्दामा नागराजको भूमिकाका रुपमा दर्शकमाझ आउँदैछन् । राज कमिक्सको चर्चित सुपरहिरो नागराजको फ्यान फलोइङ निकै ठूलो छ । बालबालिकादेखि जवानसम्मका पाठकले यसको कमिक्स बुक पढिरहेका छन् । मार्बलको सुपरहिरोजस्तै नागराजको पनि जन्मदेखि सुपरहिरो बन्नेसम्मको एउटा दमदार कथा नै छ । जो आफ्नो सुपरपावरमार्फत खराब कुरासँग लड्दै आएको छ ।
राज कमिक्सका सहसंस्थापक तथा स्टुडियो हेड सञ्जय गुप्ताले आफ्नो फेसबुकमा पोस्टमा नागराज फिल्म बनाउनका लागि एउटा संकेत दिएका छन् । ‘आजकल करण जोहर र रणवीर सिंहसँग नागराजको भेटघाट बढिरहेको छ’उनले लेखेका छन् । यो लेखाईबाट राज कमिक्सले यशराज फिल्मस्सँग हात मिलाउदै नागराजको बारेमा फिल्म बनाउने अनुमान गरिएको छ । यदि यो सत्य हो भने फिल्ममा रणवीर नागराजको भूमिकामा हुनेछन् ।
