काठमाडौं । नायक पल शाह र नायिका पूजा शर्माले प्रमुख भूमिकामा अभिनय गरेको फिल्म ‘म यस्तो गीत गाउँछु २’ को पहिलो गीत ‘तिम्रो घरको वरिपरि’ सार्वजनिक भएको छ । गीतमा अर्जुन पोखरेलको शब्द र संगीत तथा सोनम तोप्देन र अस्मिता अधिकारीको स्वर छ । सोनम निर्देशक सुदर्शन थापाको फिल्म ‘सम्हालिन्छ कहिले मन’ बाट अभिनयमा डेब्यू गर्दैछन् । फिल्म ‘म यस्तो गीत गाउँछु २’को निर्देशक पनि सुदर्शन नै हुन् ।
इलामको सन्दकपुर, पानीटारको चियाबारी र पाँचथरमा छायांकन गरिएको गीतमा पाँच सयभन्दा बढी कोरसले नृत्य गरेका छन् । गीतमा पल र पुजा फिचर्ड छन् । रामजी लामिछानेले कोरियोग्राफी गरेको गीतमा सौरभ लामाको छायांकन छ ।
आगामी फागुन २३ गते रिलिज हुने फिल्ममा हरिहर शर्मा, दिनेश डिसी, राजा राजेन्द्र पोखरेल, सोनिका रोकायलगायतका कलाकारले पनि अभिनय गरेका छन् । पूजा र सुदर्शन निर्माता रहेको फिल्ममा शिवम अधिकारी र दिनेश न्यौपानेको कथा लेखन छ ।
