काठमाडौं । गायिका देविका बन्दना नेपाली सुगम संगीत र पाश्र्व संगीतमा एउटा रुचाइएको नाम हो । कुनै बेला नेपाली फिल्ममा उनको स्वर नसुनिएको कमै हुन्थ्यो । सुगम संगीतमा पनि उनको लोकप्रियता उत्तिकै थियो । यिनै देविकाले ‘वान बीट फोर्टिन सङ्स, बेस्ट अफ देविका बन्दना’ नामक मासअप गीतहरु आफ्नै युट्युब च्यानल देविका बन्दनाबाट सार्वजनिक गरेकी छन् ।
गायिका देविकाका अनुसार उनले गाएका सबै नयाँ तथा पुराना गीतहरुको संगालो यी गीतमा सुन्न र हेर्न पाइन्छ । गीतमा ‘यस्तै रहेछ यहाँको चलन’, ‘भरे आउँछु सपनीमा’, ‘माया घटेन’, ‘मलाई नेपाली माया मनपर्छ’, ‘मेरो लागि फर्की आउन’, ‘भोलि नै कसले देख्या छ’लगायतका गीत छन् । गीतको संगीत संयोजन, मिक्सिङ र मास्टरिङ राहुल प्रधानले गरेका छन् भने अडियो रेकर्डिङ बुटवलका म्युजिक हबका साजन श्रेष्ठ र निहारिक फिल्मस्का दीपक श्रेष्ठले गरेका छन् ।
‘केही पुराना गीतहरुको भिडियो काटछाँट गरिएको छ भने नयाँ भिडियोको सुटिङ र सम्पादन लगायत सम्पूर्ण काम बुटवलकै निहारिक फिल्मस्बाट गरिएको छ’, देविकाले भनिन् । भिडियोमा नयाँ कलाकारद्वय मेनुका थापा र निहारिका श्रेष्ठको अभिनय छ । भिडियोमा योगेश शाक्यको छायांकन र सम्पादन तथा दीपक श्रेष्ठको कोरियोग्राफी र व्यवस्थापन छ । भिडियोको अवधारणा गायिका देविकाकै हो ।
