मुम्बई(एजेन्सी) । बलिउड अभिनेता सुशान्त सिंह राजपुतको आत्महत्याले उनका फ्यान अहिले पनि शोकमै छन् । सामाजिक सन्जालमा उनका फ्यान अझै पनि भावुक पोस्ट गरिरहेका छन् । एकातर्फ उनका केही फ्यानहरु सुशान्तको आत्महत्याको जाँच गर्नका लागि प्रदर्शन गरिरहेका छन् भने अर्कातिर केही फ्यानहरु आफ्नो प्रिय कलाकारलाई अलग किसिमले श्रद्धाञ्जली दिइरहेका छन् । सुशान्तका केही फ्यानले कोरोना महामारीका बीच उनको तस्बिर र सुन्दर सन्देशयुक्त मास्क बाँड्न थालेका छन् ।
सुशान्तको तस्बिरवाला मास्क सामाजिक सन्जालमा भाइरल भइरहेको छ । मास्कमा मन छुने एक सन्देश पनि लेखिएको छ । यो मास्क सुशान्तका फ्यानले निःशुल्क बाढेका हुन् । मास्कमा सुशान्तको तस्बिरसँगै ‘म हारेको छु । आत्मा मात्र एक चरा हो । हृदय चलिरहेको छ अहिले मेरो भाइ, तिमी अहिले पनि मेरो हृदयमा जीवित छौ’ भन्ने सन्देश लेखिएको छ ।
सन् २०१३ मा फिल्म ‘काई पो छे’बाट बलिउडमा डेब्यू गरेका सुशान्तले गत जुन १४ मा आत्महत्या गरेका थिए । उनको निधनपछि धेरैले बलिउडमा नातावादका कारण सुशान्त डिप्रेसनमा गएको र उनले आत्महत्या गरेको बताउँदै आएका छन् । उनले ‘शुद्ध देसी रोमान्स’, ‘एमएस धोनीः द अनटोल्ड स्टोरी’, ‘पीके’ र ‘छिछोरे’ जस्ता हिट फिल्ममा अभिनय गरेका थिए ।
