काठमाडौं । प्रेम कथानक फिल्म ‘मैले आइ लभ यु भन्नै सकिनँ’ को गीत ‘मुस्ताङको बजार’ सार्वजनिक भएको छ । आगामी शुक्रबारबाट प्रदर्शनमा आउने फिल्मको यो गीतमा बुद्धी तामाङ, अञ्जली अधिकारी, राजाराम पौडेल, दिवंगत अभिनेता जयनन्द लामा, सुजन नेपाली, कविता पुरीलगायतका कलाकारको अभिनय छ ।
गीतमा राजेशपायल राई र मेलिना राईको स्वर, दीपक रमणको शब्द र संगीत तथा कविराज गहतराजको कोरियोग्राफी छ ।
बाबु जिम्बा र शंकर कार्कीको संयुक्त निर्देशनमा बनेको फिल्मको ट्रेलर पनि सार्वजनिक भएको छ । राजधानीमा सोमबार आयोजित पत्रकार सम्मेलनमा निर्देशक बाबुले फिल्म केही समयअघि निर्माण गरिए पनि बल्ल दर्शकमाझ ल्याउन लागिएको बताए । उनले दर्शकको भावना नै बुझेर आफूहरुले फिल्म बनाएको दाबी गरे ।
कार्यक्रममा फिल्मलाई गायिका तथा अभिनेत्री डोमा ह्याल्मो, द्वन्द्व निर्देशक योगेन्द्र श्रेष्ठ, अभिनेता तथा खेलाडी ज्ञानबहादुर जिम्बा तामाङ, फिल्म निर्देशक निमा लामा तामाङलगायतले सफलताको शुभकामना ब्यक्त गरेका थिए ।
शंकर कार्कीको कथा र कार्यकारी निर्माण रहेको फिल्मको निर्मातामा प्रेम श्रेष्ठ, सह—निर्मातामा भक्तबहादुर नेपाली र मेशरबहादुर नेपाली छन् । तारा शंकर फिल्मस्को ब्यानरमा निर्मित फिल्ममा सुवास नेपाली, अनिषा सुनार, सुनील भुसाल, सुरज कार्की, लक्ष्मी भट्ट, दावा लामा, कविता पुरी, निरुता तामाङ, शितल खड्का, श्रुति मगर, सरस्वती तामाङ, इच्छा तामाङ, अर्जिता थापालगायतका कलाकारले अभिनय गरेका छन् ।
वीर मास्टरको द्वन्द्व रहेको फिल्ममा आशिष जिम्बा र सुशील डाँगीको छायांकन, तारा थापा ‘किम्भे’ को सम्पादन छ ।
