काठमाडौं । सामाजिक कथानक फिल्म ‘सतीदेवी’ को फस्र्टलुक पोस्टरले सर्वत्र चर्चा पाएको छ । लक्ष्मण सुवेदीको लेखन,निर्माण र निर्देशनमा बनेको फिल्मको गत बिहीबार सार्वजनिक फस्र्टलुकमा अभिनेत्री मलिका महत तनावग्रस्त अवस्थामा भाग्दै गरेकी छिन । उनलाई गाउँलेहरुले लखेटिरहेको देखिन्छ ।
यसअघिका फिल्म तथा म्युजीक भिडियोका कारण लभर गर्लका रुपमा परिचित भएकी मलिकालाई ‘सतीदेवी’ बाट चरित्रमा डुबेर अभिनय गर्ने मिहिनेती अभिनेत्रीका रुपमा लिन थालिएको छ ।
‘सतीदेवी’ को फस्र्टलुकको तारिफ गर्दै दीपकराज गिरी, दिनेश डिसी, रेखा थापा, ऋचा शर्मा, पूजा शर्मा, केकी अधिकारी, वर्षा शिवाकोटी, सुरक्षा पन्त, गजीत बिष्ट, प्रताप दासलगायतका सेलिब्रेटीले फेसबुकमा शेयर गरेका छन् ।
त्यस्तै सरोज खनाल, स्वस्तिमा खड्का, पल शाह, वर्षा राउत, कुन्साङ बमजनलगायतले इन्स्टामा शेयर तथा शुभकामना ब्यक्त गरेका छन् । त्यसैगरी बलिउड फिल्म निर्देशक विवेक शर्मा तथा श्रीलंका फिल्म निर्देशक तथा पत्रकार रोड्ने विडनापाथीरानाले समेत ‘सतीदेवी’ को फस्र्टलुकको तारिफ गर्दै आफ्नो टाइमलाइनमा पोस्टर शेयर गरेका छन् ।
पोस्टरमा रातो कुर्था सुरुवाल लगाएकी अभिनेत्री मलिका भाग्दै गरेकी छिन् । मुहारमा कालो मोसो दलिएको मलिकाको घाटीमा जुत्ताको माला भिराइएको देखिन्छ । गाउँले पृष्ठभूमि चित्रित पोस्टर हेर्दा मलिकाले सामाजिक विद्रोह गरेको आँकलन गर्न सकिन्छ ।
सुवेदीले पोस्टरमा यो फिल्म आफ्नी स्वर्गबासी आमा तेजकुमारी र बा भक्तिराम सुवेदीमा समर्पित गरेको उल्लेख गरेका छन् ।
दिलासा कृएसन प्रालिले गोल्डेन स्टेट मुभी मेकर्स एलएलसी क्यालिफोर्नियासँगको सहकार्यमा निर्माण गरेको फिल्मको स्क्रिप्ट र गीत निर्देशक सुवेदी स्वयम्ले लेखेका हुन् । दिलासा र सारा सुवेदीको प्रस्तुति रहेको फिल्मको निर्मातामा श्रीदेवी सुवेदी छिन् ।
मलिका शीर्ष भूमिकामा रहेको फिल्ममा हर्षिका वली र मञ्जिला बाँनिया बालकलाकार अहम् भूमिकामा रहेको बताइन्छ । साथमा कुलदीप अधिकारी, सिर्जना अधिकारी, सन्दिपबाबु लोहनी, रमेश बुढाथोकी, भोला सापकोटा, सुजीता शिवाकोटी, सन्देश लिम्बू, मनिषा सापकोटा, विमल श्रेष्ठ, इश्वरी सिंहलगायतका कलाकारले अभिनय गरेका छन् ।
दीपक शर्मा र सुवास भुसालको संगीत रहेको फिल्मका गीतमा प्रताप दास, दीपा लामा,ममता गुरुङ र सबिन सुवेदीको स्वर छ । बाबु श्रेष्ठले खिचेको फिल्मको सम्पादन तारा थापा ‘किम्भे’ ले गरेका हुन् भने कोरियोग्राफी रामजी लामिछाने र पाश्र्व संगीत सम्राट थापाको छ । कुनाल कँुवरको कलर ग्रेडिङ रहेको फिल्मको प्रदर्शन मिति छिट्टै सार्वजनीक गरिने बताइएको छ ।
