काठमाडौं । अभिनेता दयाहाङ राई र अभिनेत्री दिया पुनको मुख्य भुमिका रहेको फिल्म ‘दयारानी’को टिजर सार्वजनिक भएको छ । दयाहाङ र दियालाई श्रीमान श्रीमतिको रुपमा देखाइएको टिजरमा उनीहरुको निःसन्तान पीडालाई देखाइएको छ ।
दियाले दयालाई अर्को विवाह गर्न प्रस्ताव गरे पनि दयाले त्यसलाई अस्वीकार गरेको टिजरमा देख्न सकिन्छ । फिल्म ‘ह्याप्पी डेज’, ‘मिष्टर झोले’ पछि ‘दयारानी’मा दयाहाङ र दियाको तेस्रो सहकार्य हो ।
अभिनेता माओत्से गुरुङको निर्देशन रहेको ‘दयारानी’ यही माघ २६ गते रिलिज हुँदैछ । बाँसुरी फिल्मस् र माओत्से फिल्मसको ब्यानरमा निर्माण भएको फिल्ममा दयाहाङ र दियाका अलावा विजय बराल, प्रमिसा गुरुङ, पुस्कर गुरुङ, टिकाराम घले, शिरिषा कुँवर, नयन गुरुङ, सुर्य सुनार, राजेन्द्र थापा, सीतादेवी गुरुङ र क्रिष्टी गुरुङलगायतको अभिनय छ ।
मोहन गुरुङ, किरण गुरुङ, केन्द्र लिम्बु र न्यू आइटी भेन्चरको सहकार्यमा निर्माण भएको फिल्मका कार्यकारी निर्माता रामबाबु गुरुङ र अपिल विष्ट हुन् । फिल्मको कास्टिङ डिरेक्टर मणिराम पोखरेल हुन् । शैलेन्द्र डी कार्कीको छायांकन रहेको फिल्म नेपालमा प्रचण्डमान श्रेष्ठको कम्पनी टिफल्क फिल्मस र विदेशमा सेभेन सिज इन्टरटेनमेन्टले वितरण गर्नेछ ।
