काठमाडौं । आगामी मंसिर २८ मा रिलिज हुने फिल्म ‘सुश्री सम्पति’ को ट्रेलर सार्वजनिक भएको छ । ट्रेलरमा फिल्मका प्रमुख दुई पात्र सलोन बस्नेत र विनोद न्यौपानेले सुश्री सम्पतिको पछाडी लाग्नुको कारण र प्राप्तिको लागि गरिने संघर्षलाई देखाइएको छ । ट्रेलरमा विनोदले बोलेको ‘यो ब्ल्याकमेल गर्ने ट्रेनिङ कतै पाइन्न’ भन्ने संवाद निकै रोचक लाग्न सक्छ ।
ट्रेलरमा सलोन बस्नेत, सारा सिर्पाली, विनोद न्यौपाने, प्रमोद अग्रहरी, विशारद बस्नेत र राजाराम पौडेल फिचर्ड छन् । फिल्मको ट्रेलरलाई सहिल खानले तयार पारेका हुन् । रंग पत्रकार सुव्रत आचार्यको निर्देशनमा तयार भएको फिल्ममा विशारद बस्नेत, सुनिता श्रेष्ठ ठकुरी लगायतका कलाकारहरुको पनि अभिनय रहेको छ भने प्रियंका कार्की विशेष भूमिकामा छिन् । रमेश त्वायना प्रस्तुतकर्ता रहेको ‘सुश्री सम्पत्ति’ को कथा निर्देशक सुव्रत आफैले लेखेका हुन् । फिल्मको निर्मातामा विज्ञान राई, नुनम सुब्बा र रमन सिलाकार रहेका छन् ।
अभिमन्यू निरवी र निर्देशक आचार्यको डाइलग रहेको फिल्मको स्क्रिनप्ले अभिमन्यूकै रहेको छ । फिल्मलाई उपत्यकामा बिके फिल्मसका गोपालकाजी कायस्थ र मोफसलमा एफडी कम्पनीले वितरण गर्नेछ । फिल्मलाई भरत रेग्मीले सम्पादन गरिरहेका छन् । सार्वजनिक पोस्टरलाइ टौवा क्रिएसनले तयार पारेको हो ।
