काठमाडौं । कभर गीतका भारतीय गायक सोनाम तोप्देनले नेपाली नायिका पुजा शर्माको मन सम्हाल्ने भएका छन् । सुदर्शन थापाले निर्देशन गर्ने नयाँ फिल्म ‘सम्हालिन्छ कहिले मन’ मा हिरोका रुपमा अनुबन्धित भएका सोनामले बुधबार राती नेपाल आएपछि निर्देशक तथा निर्मातासँग कामको लागि औपचारिक सम्झौता गरेपछि फिल्ममा उनी फाइनल भएका हुन् ।
निर्देशक थापा र सहनिर्माता अजितकुमार थापाले सोनामसँग सम्झौता गरेपछि सोनाम फिल्मका लागि फाइनल भएका हुन् । अमित बस्नेत निर्माता रहने फिल्ममा आकाश श्रेष्ठ पनि प्रमुख भूमिकामा रहने चर्चा चले पनि निर्माण पक्षले यो विषयमा केही मुख खोलेको छैन ।
प्रेमकथा बोल्ने यो फिल्मको छायांकन आगामी डिसेम्बर मध्यबाट हुनेछ । फिल्म नेपालको मनाङ र मुस्ताङसहित विदेशको स्कटल्याण्डमा छायांकन गरिनेछ । फिल्ममा सौरभ लामाको छायांकन, अर्जुन पोखरेल, सुगम पोखरेल र ताराप्रकाश लिम्बुको संगीत,कविराज गहतराजको कोरियोग्राफी रहनेछ । फिल्ममा सरोज खनाल र गौरी मल्लको पनि अभिनय रहनेछ ।
