काठमाडौं । अभिनेता विपिन कार्कीलाई गोठाले चरित्रमा प्रस्तुत गरिएको फिल्म ‘गोपी’ को ट्रेलर सार्वजनिक भएको छ । सार्वजनिक ट्रेलरमा विपिनले बैंकबाट ऋण लिएर गाईपालन गर्दाको संघर्षदेखि नायिका सुरक्षा पन्तसँग उनको प्रेम, विपिन प्रति उनको पिताले गर्ने घृणालगायतका विषय समेटिएका छन् ।
ट्रेलरमा फिल्मका प्रमुख पात्र विपिन कार्की दुधले नुहाइरहेको देखाइएको छ । तर के कारणले उनी दुधले नुहाउन बाध्य छन् त्यो जान्न दर्शकले फिल्म नै हेर्नुपर्ने हुन्छ ।
फिल्ममा सुरक्षा प्रेमिका र बर्षा भेटनरी डाक्टरको चरित्रमा छिन् । फिल्म निर्देशक दीपेन्द्र लामाले दर्शकले हेरिरहेका फिल्म भन्दा केही फरक कथामा ‘गोपी’ बनाएको बताए । उनले यसअघि फिल्म ‘घामपानी’ निर्देशन गरिसकेका छन् । नायक विपिन कार्कीले अघिल्ला फिल्ममा भन्दा फरक चरित्रमा आफूलाई दर्शकले हेर्न पाउने खुलाए ।
माघ १८ गतेबाट प्रदर्शनमा आउने फिल्ममा अंकित खड्का, कमलमणि नेपाल, भोलाराज सापकोटालगायतका कलाकारको अभिनय छ । आरोही केसी निर्माता रहेको फिल्ममा सञ्चारकर्मी श्रीधर पौडेल कार्यकारी निर्माताको छन् । फिल्ममा सामिप्यराज तिमल्सिनाको पटकथा, शैलेन्द्र डी कार्कीको छायांकन र गोविन्द राईको कोरियोग्राफी छ ।
