काठमाडौं । आगामी चैत २९ गते रिलिज हुने फिल्म ‘यात्रा’ को अफिसियल टिजर सार्वजनिक भएको छ । राजधानीमा बिहीबार एक कार्यक्रमका बीच फिल्मकर्मी र पत्रकारमाझ टिजर सार्वजनिक गरिएको हो ।
प्रेम र एक्सनले भरिपूर्ण टिजरमा नायक सलोन बस्नेत र सलिनमान बनियाँलाई आक्रोशित लुक्समा देखाइएको छ । एक दृश्यमा भिलेन शैलीमा सलोनलाई पेस्तोल बोकेर कसैलाई ताकेको देखाइएको छ । अर्को दृश्यमा सलिनमानलाई हेलिकप्टरबाट ओर्लिएर रिसाएर हिँडेको देखाइएको छ ।
टिजरमा नायिका मल्लिका महतसँगको सलिनमानको प्रेमलाई लुकाइएको छैन । सम्राट शाक्यको डेब्यु निर्देशन रहेको फिल्ममा जान्वी बस्नेत, प्रेक्षा बज्राचार्य, धिरेन शाक्य, राजाराम पौडेललगायतको फिल्ममा अभिनय छ । विदेशी कलाकारहरु चाइनाका जुन झाङ र केन्याका बबीको पनि अभिनय रहेको छ । फिल्ममा बालकलाकारको रुपमा अंकित संग्रौला र एन्जल राई रहेका छन् ।
फिल्मलाई केशव भट्टराई र सुशील पोखरेलले संयुक्त रुपमा निर्माण गरेका हुन् । यसको कार्यकारी निर्माता सर्जुमान लिगल रहेका छन् । फिल्ममा बिक्रम पराजुली, मुक्ति तिमल्सिना र रामशरण घिमिरे सह–निर्माता छन् ।
