मुम्बई(एजेन्सी) । बलिउड अभिनेता सलमान खानको फिल्मी ग्राफ अहिले उत्कृष्ट फेजमा छ । उनको फिल्म छनोंट शैलीमा बितेका वर्षमा ठूलो परिवर्तन आएको छ । एक्सन, कमेडीका अलावा गम्भीर भूमिकामा उनलाई दर्शकले रुचाउन थालेका छन् । सलमानको मल्टीस्टारर फिल्म ‘भारत’ पछि ‘दबंग ३’, ‘इन्शाअल्लाह’ पाइपलाइनमा छन् ।
समाचार अनुसार सलमान अर्को एउटा शक्तिशाली प्रोजेक्ट लिएर आउँदैछन् । यो प्रोजेक्ट बीएसएफ अर्थात सीमा सुरक्षा बलको बायोपिकमा आधारित हुनेछ । सलमान भारत वरीपरी घुम्ने कथा भएकाले यसबाट प्रभावित छन् । हालै मात्र एक ठूलो ब्यानरले उनलाई बायोपिकमा काम गर्नका लागि प्रस्ताव गरेको थियो ।
फिल्मको कथा एक सीमा सुरक्षा बलका जवानको जिन्दगीमा आधारित हुनेछ । फिल्ममा कश्मीरको सेट लगाइनेछ । यो एक भारतीय सैनिकको साहस र प्रेरणाको कथा हुनेछ । जसले १२–१४ वर्ष अगाडि आफ्नै बलले मुजाहिद्दीनको आंतकको अन्त्य गरेको थियो ।
सलमानले यस्तो साहसी कथा दर्शकमाझ पुग्नु आवश्यक ठानेर नै यो फिल्ममा काम गर्ने ग्रिन सिग्नल दिएका छन् । सलमानले मौखिक रुपमा फिल्ममा काम गर्न सहमति दिइसकेका छन् । तर फिल्मको सुटिङको समय तोक्न बाँकी छ ।
