काठमाडौं । आगामी साउन १० गतेबाट सार्वजनिक प्रदर्शनमा आउने फिल्म ‘एकलव्य’को ट्रेलर सार्वजनिक भएको छ । अनमोल शर्माले निर्देशन गरेको फिल्मको ट्रेलरमा एक्सनलाई प्राथमिकता दिइएको छ । ट्रेलरमा गुण्डागर्दी, अपहरण, हत्या, भ्रस्टाचारजस्ता अहिलेका विविध समस्यालाई प्रस्तुत गरिएको छ ।
निर्देशक शर्माका अनुसार फिल्म समसामयिक बिषयमा निर्माण गरिको सामाजिक प्रेमकथामा आधारित छ । फिल्ममा सोनम थापामगर, पुष्कर राउत, ओसिन भट्टराई, महिला सिलवाल, शुशिल पोखरेल, शुष्मा कार्की, राजेन्द्र दुलाल, बिराग लोगुनसहितको अभिनय रहेको छ । फिल्ममा राजेन्द्र दुलाल, सोनाम थापामगर र अभी थापामगरको लगानी छ ।
फिल्ममा कृष्ण श्रेष्ठको छायाँकन, अर्जुन जिसीको सम्पादन, कविराज गहतराज र रामजी लामिछोनेको कोरियोग्राफी, राजेन्द्र बजगाईंको गीत÷संगीत, भोजराज देवकोटाको पटकथा सम्बाद रहेको छ ।
दुई साता अघि यो चलचित्रको ‘पूर्वै चल्नेया रेल…’को भिडियो रिलिज गरिएको थियो । रामचन्द्र काफ्ले र जुनु रिजालको स्वरमा रहेको लोक लयमा आधारित यो गीतको भिडियोलाई दर्शकले मन पराएका छन् ।
