काठमाडौं । आगामी फागुन २३ गतेबाट प्रदर्शनमा आउने फिल्म ‘म यस्तो गीत गाउँछु २’ को दोस्रो गीत ‘दुःखको काँडा’ सार्वजनिक भएको छ । गीतको भिडियोमा अभिनेता पल शाह र अभिनेत्री पूजा शर्मा फिचर्ड छन् ।
गीतमा देवल भण्डारीको शब्द, अर्जुन पोखरेलको संगीत र गायक सनिष श्रेष्ठको स्वर छ । सनिष गायन रियालिटी शो भ्वाइस अफ नेपालबाट चर्चामा आएका गायक हुन् । गीतमा रामजी लामिछानेको कोरियोग्राफी छ । गीतको भिडियोमा काठमाडौंको त्रिपुरेश्वरमा कृतिम हिउँ पारेर छायांकन गरिएको छ ।
सुदर्शन थापा निर्देशित फिल्ममा हरिहर शर्मा, दिनेश डिसी, राजा राजेन्द्र पोखरेल, सोनिका रोकायलगायतका कलाकारहरुको अभिनय छ । शिवम अधिकारी र दिनेश न्यौपानेले फिल्मको कथा लेखेका हुन् । पूजा र सुदर्शन फिल्मका निर्माता हुन् । बनिष शाह र मिलन श्रेष्ठको सम्पादन रहेको फिल्म सौरभ लामाले खिचेका हुन् ।
