धरान । रेडमुन इन्टरटेन्मेन्टको आयोजनामा गत वर्षको मंसिरमा सम्पन्न प्रदेश नं १ स्तरीय गायन प्रतियोगिता ‘स्टेट १ सिङगिङ आइडल २०७६’ पहिलो संस्करणका विजेताहरूलाई पुरस्कार प्रदान गरिएको छ ।
प्रतियोगिताकी विजेता झापाकी जस्मिन बराललाई कुमार एण्ड सन्स अटो धरानका भेष्पा एण्ड अप्रिलिया सोरूम धरानले प्रायोजन गरेको अढाई लाखभन्दा बढी मूल्यको भेष्पा स्कुटीको चाबी गायक दीप श्रेष्ठले प्रदान गरेका थिए । प्रतियोगिताकी दोस्रो उदयपुरकी शोभा तामाङलाई नगद ७०हजार र तेस्रो पाँचथरका समीर महतेलाई ५० हजार प्रदान गरिएको थियो । सबसारा रिर्सोट भेडेटारको प्रायोजनमा उत्कृष्ट सहभागिताको लागि बराहक्षेत्रका गोमा कुलुङलाई १५ हजार प्रदान गरिएको छ ।
विजेताहरुलाई समाजसेवी तथा धरानका गायक किरण श्रेष्ठ, सिल्भर इन्टरटेन्मेन्टका सौरभ श्रेष्ठ, सौगात रिजाल र अध्यक्ष रोशन प्रधानले उक्त पुरस्कारहरू वितरण गरेका थिए । गत चैतमा नै वितरण गर्ने भनिए पनि कोरोना महामारीको कारण अहिले आएर मात्र पुरस्कार वितरण गर्न सकिएको आयोजक रेडमुन इन्टरटेन्मेन्टका अध्यक्ष रोशन प्रधानले बताए । कोरोना महामारी साम्य भएपछिमात्र दोस्रो संस्करणको लागि तयारी गरिने अध्यक्ष प्रधानले बताए ।
