काठमाडौं । ब्युटी पेजेन्टको फिनाले दृश्यको छायांकनसँगै गत पुषमा घोषणा गरिएको फिल्म ‘हृदय भरी’ को सुटिङ शुक्रबारबाट शुरु भएको छ । सुरज सुब्बा नाल्बो निर्देशित फिल्मले ४५ दिनको समय तालिकासँगै राजधानीमा रहेको ’द भ्वाइस अफ नेपाल’ को सेटलाई ब्युटी पेजेन्टको छायांकनस्थल बनाएर सुटिङ सुरु गरेको हो । ‘यो फिल्मको महत्वपूर्ण दृश्य हो । जसले फिल्ममा नयाँ मोड ल्याउछ’ निर्देशक नाल्बोले भने ’ब्युटीप्याजेन्टको फिनालेको दृश्यको सजावट हो । त्यसैले निकै मेहनतका साथ् खिचिरहेका छौ ।’
झन्डै पन्ध्र बढी व्यावसायिक मोडलसँगै डेब्यु गर्ल श्रद्धा र रेखालाई कोरियोग्राफर जयन सुब्बा मानन्धरले कोरियोग्राफ गरेकी थिइन् । फिल्मको यस दृश्यलाई निर्देशक सुब्बाले ४ वटा क्यामेराको माध्यमबाट कैद गरेका छन् । उनले फिल्मको विषय काठमाडौंकै रहेकाले गीत चाहिँ धरान र विदेशमा खिचिने बताए ।
उनकै लेखन रहेको फिल्ममा पल शाह, नीर शाह, सुनिल थापा, आकाश बाबु, अनुराग कँुवर, निर्मल शर्मा, सलोन बस्नेत, रेखा लिम्बु, मनोज केसी, कविता रेग्मी, अभिदिथ खाती, बिके श्रेष्ठ, दीपक गजमेर, प्रेम श्रेष्ठ, हटीनटी अनुपम श्रेष्ठ, आयुषमान घिमिरे, सुमन श्रीलगायतको अभिनय रहनेछ । यसैफिल्म मार्फत श्रद्धा छेत्री नेपाली फिल्ममा डेब्यु गर्दैछिन् ।
एन फिल्मस् एण्ड क्रिएशन, शाह प्रोडक्सन र दिपीन्द्र फिल्मसको संयुक्त ब्यानरमा निकेश लिम्बु, चन्दन शाह तथा दिपीन्द्र राईले फिल्म निर्माण गरेका हुन् । फिल्ममा सौरभ बिश्वास र रुचि बिश्वास सह–निर्माता छन् भने चन्दन शाह प्रस्तुतकर्ता हुन् । फिल्ममा मानकृष्ण महर्जनको छायांकन, अर्जुन पोखरेल, हरी लम्साल, दिपक शर्माको संगीत, कविराज गहतराज र प्रविन सिंहको कोरियोग्राफी, केदार भुषालको लेखन, बिपिन मल्लको सम्पादन छ । फिल्म आगामी वर्षको भाद्र २७ मा रिलिज हुनेछ ।
